Nagpakdaar ti National Disaster Risk Reduction and Management Council (NDRRMC) para ti posible a panagtennag dagiti rocket debris iti Long March 7 a nakatuding manen a patayebaen ti China manipud Wenchang Space Launch Site idiay Hainan Province.
Maibasar iti pakdaar nga inruar ti NDRRMC, mabalin a maangay ti launching ti nagbaetan ti Hulyo 15 agingga Hulyo 17 agdama a tawen.
Kinuna ti konseho a posible nga agtennag dagiti paset ti rocket kadagiti nagduduma a paset ti teritoryo ti Pilipinas a mabalin met a mangpeggad ti biag dagiti mangngalap.
Sumagmamano a nadakamat a posible nga drop zone ket idiay Bajo de Masinloc, 88 a milya manipud Cabra Island, Occidental Mindoro; 51 miles manipud Recto Bank, ken 118 miles manipud Busuanga, Palawan.
Binallaagan ti NDRRMC iti Philippine Coast Guard, Bureau of Fisheries and Aquatic Resources, ken Department of Environment and Natural Resources – National Mapping and Resource Information Authority a mangiruar met iti kapada nga abiso para iti publiko.
Impakonsidera da kadagiti nasao nga ahenisya iti madagdagos a pannakaipatungpal ti temporary restrictions iti panangipaulog ti Notice to Mariners ken Coastal Navigational Warnings kadagiti drop zones.
Nagballaag pay ti konseho kadagiti lokal a gobierno ken opisina a bantayan iti sitwasyon, nangruna kadagiti makasakop dagiti nasao a lugar.
