Kalpasan ti uppat a tawen a panaglemmeng ket nagparangen ni Julie “Totoy/Dondon” Patidongan, whistleblower ti kaso dagiti “missing sabungeros,” tapno pormal a mangipila ti reklamo kontra kadagiti 12 a pulis a segun kenkuana ket nang-kidnap ken nangpapatay kadagiti biktima.
Manipud iti impila na nga affidavit complaint idiay NAPOLCOM ita nga aldaw ti Lunes, Hulyo 14 ket imbatad ni Patidongan a dumanon ti nasursurok sangagasot ti pudno a bilang dagiti mammallot a napapatay.
Imbutaktak na amin ti maysa a press conference a naiturong dagiti nasao a mammallot ti maysa a farm asideg idiay Taal Lake. Daitoy ket renrentaan ti maysa a pulis a karaman metlaeng iti krimen, sakbay a pinatay ken imbelleng ti bangkay dagiti biktima iti nasao a kadanuman manipud 2021 agingga 2022.
Saanen a nalapdan pay ni Patidongan nga agsangit idi nadamag nu apay nga ita laeng isuna a naparang.
Nupay saan na a ninaganan nu siasino ti nagpangta iti pamilya na, direkta na a dinakamat ti prominente a negosyante a ni Charlie “Atong” Ang kas mastermind iti krimen. Impunto na a ni Ang ti nangbilin iti panangpatay kadagiti mammallot gapo iti panag-Tyope wenno match fixing.
Kabayatanna, nainget met a pinaglibakan ni Ang dagiti akusasyon ken nangipila met isuna iti kaso kontra kenni Patidongan, pakairamanan ti robbery, grave threat, ken panangdadael iti nagan.
Iti sabali a bangir ket madama met iti isaysayangkat a search operations ti Philippine Coast Guard idiay Taal Lake ken lima a sako itan dagiti nauram a tulang ti tao ken ayup ti narekobre da iti danum.
Segun iti NAPOLCOM, manamnama a mairuar ti resolusyon ti las-ud ti 60 nga aldaw mainaig kadagiti reklamo ni Patidongan.
