Apektado ti pakabuklan a 4,229 a pasahero kadagiti eropuerto kalpasan a makanselar dagiti flights gapo iti kasasaad ti panawen nga inggubuay ti Bagyong Crising.
Segun iti Civil Aviation Authority of the Philippines (CAAP), 18 domestic flights ti kanselado para ti aldaw ti Biernes, Huyo 18 bayat a dua a flights met ti na-divert idi kallabes nga aldaw ti Huwebes, Hulyo 17.
Maibasar ti abiso nga inruar ti ahensiya, kanselado dagiti domestic flights dagiti sumagmamano nga airline companies partikular dagiti biahe ti Manila- San Jose vice versa, Manila – Virac vice versa, Manila – Tuguegarao vice versa, ken Manila – Cauayan vice versa.
Mainayon kadagiti kanselado ket dagiti flights ti Busuanga- Manila, Manila – Cauyan vice versa, Manila – Basco, Batanes vice versa, ken Clark – Basco vice versa.
Para ti Visayas, kanselado dagiti flights ti Cebu – Masbate vice versa, ken Manila – Naga vice versa.
Nailista ti CAAP dagiti diverted flights partikular ti biahe a Manila – Busuanga a nagsubli idiay Maynila gapo iti Bagyong Crising.
Naballaagan met dagiti apektado a pasahero a makikoordinar kadagiti airline companies tapno matulongan ida ti rebooking wenno refund kadagiti tickets.
