Inyanunsyo ni Finance Secretary Ralph Recto a posible a maisubli ti subsidiya ti gobierno iti PhilHealth inton sumaruno a tawen, kasaruno a maikkatan daitoy iti kanayunan a pondo ita a tawen.
Segun kenni Recto, P53.26B ti naisingasing a subsidiya para ti PhilHealth inton tawen 2026, nababbaba iti 28.44% nu idasig iti P74.43B a naisingasing idi para ti tawen 2025.
Nupay kasta, inikkat daitoy ti Bicameral Conference Committee kalpasan a makita nga adda iti P280.575B a reserve fund ti PhilHealth.
Iti agdama ket dumanonen ti P145.36B ti nabayadan iti PhilHealth a benefit claims agingga idi bulan ti Hunyo ti agdama a tawen, agarop doble nu idasiog iti P76.89B iti kapada a bulan idi napalabas a tawen.
Laksid iti zero subsidy, impasiguro ni Fund Management Sector Senior Vice Renato Limsiaco Junior a kabaelan latta ti PhilHealth a mapondoan ti nalawlawa a benepisyo na. Daitoy ket gapo iti manamnama a P348B a pondo ti PhilHealth iti panagleppas ti tawen 2025.
Innayon pay ni Recto a papigsaen ti gobierno ti serbisyo pangsalun-at kadagiti ospital ti DOH, nangruna kadagiti probinsya nga agkurkurang dagiti pasilidad.
Malaksid iti daitoy ket panggep pay ti gobierno iti zero-balance billing, karaman dagiti specialty hospitals.
Kabayatanna, awan met iti plano iti panagngato ti kontribusyon dagiti miembro ti PhilHealth inton sumaruno a tawen.
Maipalagip a binilin ti DOF iti PhilHealth nga iyakar ti P89.9B da iti National Treasury agsipud ta limmagpas daitoyen iti P500B a reserve fund.
Nupay kasta ket kalpasan dagiti pammabalaw manipud nagduduma a sektor ken ti temporary restraining order ti manipud Korte Suprema, P60B paylaeng iti naiyakar ti PhilHealth.
