Agtaltalinaed a nakadeploy dagiti Humanitarian Assistance and Disaster Response team ti Philippine Army kadagiti nagduduma a paset ti Northern Luzon tapno umasistir ti panangbakwit kadagiti apektado a residente gapo iti nasaknap a panagtudo.
Sumagmamano a Disaster Rescue and Response Unit (DRRUs) manipud Philippine Army Major Units (PAMUs) ti naipatulod kadagiti nagduduma a komunidad ditoy Amianan a Luzon ken agtalinaed da iti lugar agingga saan nga agsarsardeng iti Southwest Monsoon wenno Habagat.
Malaksid iti panangisayangkat ti life-saving rescue operations ket nabilin da pay a tumulong kadagiti serye ti relief operations.
Segun iti Army, addaan kabaelan ti unit da a mangisayangkat ti clearing operations ken umalalay kadagiti lugar a nakapagrehistro ti panagreggaay ti daga, rockslide, ken soil collapse.
Tugot met dagiti nakadeploy nga army units dagiti assets ti kasundaluhan kas dagiti rescue boats, life vest, agraman military truck, ken dadduma pay.
Kinuna ti hanay da a ti panangideploy ti personnel ken equipments ket paset ti koordinasyon da iti National Disaster Risk Reduction and Management Council (NDRRMC) nga isu ti mangidadaulo iti unified response ti gobierno.
