Pinasingkedan ni House of Representatives spokesperson Princess Abante a simmungbat dan iti direktiba ti Korte Suprema a mangipaay da ti impormasyon ken dokumento mainaig ti impeachment kenni Vice President Sara Duterte a nakasapata.
Nagtaud iti pammilin ti korte kadagiti impila a petisyon ti kampo ni VP Sara a kumidkiddaw nga isardengen iti impeachment trial.
Iti maysa a waragawag ket kinuna ni opisyal ti Kamara nga insubmitiren ti Office of the Solicitor General (OSG), tumaktakder a counsel ti House, iti pleading online babaen ti Philippine Judiciary Portal ket inserbi kadagiti amin a maseknan a partido babaen ti electronic service.
Kabayatanna, nakatuding met iti panangisubmitir ti physical copy idiay Korte Suprema babaen ti personal service inton aldaw ti Lunes.
Inlawlawag ni Atty. Abante a dagiti immun-una a tallo a reklamo kontra iti Bise Presidente ket karaman iti Order of Business iti uneg ti 10-session-day timeline kas mandato iti konstitusyon.
Iti met maikauppat ket sinuportaran ti nasurok one-third a miembro ti Kamara, nga impatulod da met a direkta idiay Senado kas Articles of Impeachment.
Impasiguro ni Atty. Abante iti publiko nga agraira iti due process para iti Bise Presidente para ti intero nga impeachment trial nu kasta ket maipresentar na amin nga ebidensya ken madepensaan na iti bagbagi na.
