Nailista ti Philippine Institute of Volcanology and Seismology (Phivolcs) dagiti uppat a volcanic earthquakes iti aglawlaw ti Bulkang Kanlaon iti las-ud ti 24 nga oras.
Agtultuloy pay ti panagngato ti sulfur dioxide emission ti bulkan a dimmanon ti 3,380 a tonelada idi Hulyo 16.
Iti agdama ket agtaltalinaed latta a naka-Alert Level 3 ti bulkan, indikasyon nga adda iti magmatic unrest wenno aktibidad nga adda pakainaigan na iti panaggaraw ti magma.
Gapo iti daitoy ket nairekomendar iti panagbakwit dagiti residente iti uneg ti 6-kilometer danger zone ken panangiparit iti panagpatayab ti aniaman a klase ti aircraft asideg ti crater.
Nagpakdaar pay ti Phivolcs kadagiti posible a peggad kas iti kellaat a panagbettak, pana-ayos ti lava, ash fall, rockfall, kasta met iti lahar iti panawen ti panagtutudo, ken iti pyroclastic flow.
Kabayatanna, impadamag ti Department of Social Welfare and Development (DSWD) a ngimmaton iti 94,737 ti pakabuklan a bilang dagiti apektado nga indibidwal manipud iti sigud a bilang nga 94,228. Aganay P195M metten iti naiwaras a tulong para kadagiti apektado.
