Dinayeg ti dua a napipigsa a ginggined iti Russia, idi laeng aldaw ti Dominggo.
Immuna a nangdayeg iti magnitude 6.6 a ginggined a sinaruno met iti magnitude 7.5 asideg ti kabaybayan a masakopan ti rehiyon ti Kamchatka, abagatan a paset ti Russia idi Dominggo, segun iti datos manipud German Research Centre for Geosciences (GFZ).
Ti umuna a ginggined nga immuna a nairehistro a magitude 6.2 ket nakailista iti 10 a kilometro a kauneg. Dagos daitoy a napasarununan ti maikadua a magnitude 7.5 nga adda kauneg a 17km. Nangdayeg dagitoy ti agarop maysa a minuto, rason a nagsiruar dagiti tattao kadagiti pasdek.
Gapo iti insidente ket impakdaar ti Russia TASS news agency dagiti posible a dadakkel nga alon a dumanon ti agingga 15-60 centimeters idiay Aleutsky District, Commander Islands, Ust-Kamchatsky region, ken Petropavlovsk-Kamchatsky.
Kabayatanna, awan met iti naipadamag a pimmusay ken inikkaten ti Pacific Tsunami Warning Center ti pangta iti tsunami idiay Kamchatka Peninsula kalpasan dagiti dua a ginggined.
Iti biang ti Pilipinas, impasiguro met iti Philippine Institute of Volcanology and Seismology (Phivolcs) nga awan iti pangta ti tsunami ditoy pagilian nupay nagpakdaar iti panagngato ti alon kadagiti kabaybayan nga agingga 300 kilometro ti kaadayo na manipud iti epicenter.
