Nagyaman iti Department of Social Welfare and Development (DSWD) kenni Philippine National Police (PNP) Chief General Nicolas Torre III gapo iti nasurok P16 million a donasyon manipud iti event a “Boxing for a Cause: Laban sa Nasalanta” a naangay iti Rizal Memorial Coliseum idiay Manila.
Segun kenni DSWD Assistant Secretary ken spokesperson Irene Dumlao, dakkel ti tulong iti nasao a gatad para kadagiti minilyon a pamilya nga apektado ti habagat ken dadduma pay a kalamidad.
Maipalagip nga iti boxing match ket inorganisa ti PNP ken napangabakan ni General Torre babaen ti default win kalpasan ti saan a panagparang ni acting Davao City Mayor Sebastian “Baste” Duterte gapo iti kaadda na idiay Singapore kadua ti pamilyana.
Manipud iti nasao nga aktibidad, naka-uror ti nasurok P300,000 manipud kadagiti entrance fees ken kanayunan a P16 million manipud kadagiti donasyon.
Nakaituding met a maiturn over iti pakabuklan a kantidad iti DSWD ita a lawas.
Kabayatanna, dumanon iti P293 million iti pakabuklan nga ayuda a naipaay ti DSWD kadagiti apektado nga indibidwal ken pamilya manipud idi Hulyo 26, 2025.#
