Silulukat ni Baguio City Mayor Benjamin Magalong para ti posibilidad nga agbalin a paset ti independent body a mangisayangkat ti imbestigasyon seknan kadagiti maanomalya a flood control project ti intero a pagilian.
Segun kenni Mayor Magalong, nakasagana isuna nga ag-volunteer basta isuna iti agpagpili dagiti agbalin nga imbestigador kasta met a kiniddaw na a nu mabalbalin ken isuna pay ti agpili kadagiti ahensiya a mangbukel iti independent body nu kasta ket agbalin a “credible” iti imbestigasyon ken ‘reputable’ dagiti lead agencies a mangisayangkat iti panagadal.
Para ti pakabuklan nga imbestigasyon, kinunana a mabalin na a mausar dagiti kapadasan na kas sigud nga Heneral ken imbestigador ti Philippines National Police.
Sakbayna ket immuna metten nga insingasing ni Presidential son, Rep. Sandro Marcos a maysa nga independent body ti mangisayangkat iti imbestigasyon ken saan a mismo a ti Kamara.
Daitoy ket gapuna ta dagiti karaman iti kaso dagiti maanomalya a flood control project ket dagiti metlaeng kongresista a tumaktakder pay kas contractor wenno addaan ti koneksyon kadagiti construction firms.
Agtalek ni Magalong nga awanan ti umdas a kapasidad ti Kamara wenno ti Regional Project Monitoring Office ti Departmeny of Public Works and Highways nga imbestigaran dagiti nakad-adu a flood control projects ditoy pagilian
Rumbeng laeng kunan a sabali nga entidad wenno lupon ti mangibestigar a saan a kabaela a madiktaran wenno maimpluwensiyaan dagiti mamanday-linteg a naawaganen payen kas legislator-contractors.
Impasiguro ti Mayor a numan pay dakkel a karit ti panangala kadagiti ebidensya, adda met dagiti wagas tapno a takuatan dagiti koneksyon dagiti maanomalya a proyekto ti gobierno.
