Impeksa ti lider ti military-backed government ti Myanmar a ni President Min Aung Hlaing idi Miyerkules nga irepaso ti administrasyon na iti sangsangwen a relasyon daitoy iti Association of Southeast Asian Nations (ASEAN) kagiddan iti panagbabalaw iti maipagarop a saan a patas a panagtrato ti regional block.

Inaramid ni Min Aung Hlaing iti waragawag iti sango dagiti 540 nga agpanpanday-linteg ken opisyal idiay Naypyitaw kalpasan nga ipaganetget maneg dagiti lider ti ASEAN iti naangay a summit ditoy Pilipinas a kurang latta iti progreso ti Myanmar iti panangipatungpal ti five-point peace plan.

Kinuna na nga saan nga inkalintegan iti waragawag ti ASEAN ken imbatad a personal a posisyon laeng daitoy dagiti sumagmamano a lider a saan a kas maysa a block.

Iti nasurok dua oras a speech, binabalaw na met iti ASEAN gapu iti maipagarop a panangikabil ti political pressure ken panangibabain iti Myanmar, banaga a saan da met nga inaramid kadagiti miembro a pagilian a dimmalan met iti kudeta ken krisis pampolitika manipud idi 1967.

Laksid daitoy, inlawlawag ni Min Aung Hlaing nga itultuloy ti Myanmar iti pannakikoordinar kadagiti indibidwal a miyembro ti ASEAN ken mangisayangkat da ti peace conference inton Pebrero tapnu magun-od iti napaut a kinakapia.

Maipalagip nga agtaltalinaed nga isolated iti international community iti Myanmar ken maiparit dagiti nangangato nga opisyal daitoy kadagiti panagtataripnong ti ASEAN manipud idi agumen ti militar iti bileng manipud iti gobyerno ni Aung San Suu Kyi idi 2021.