Impasiguro ni Assistant Minority Leader ken Akbayan Party-list Representative Chel Diokno nga adalen da a nalaing ti singasing a 2026 National Budget.
Pagaammo a ti singasing a pondo para inton sumaruno a tawen 2026 ket aganay ₱6.793 trillion.
Segun kenni Diokno, napateg a madakamat nu sadino metlaeng ti pagturturongan na a proyekto ken programa ti buis dagiti Pilipino.
Imbatad ti nalatak nga abogado a nakasaganan dagiti saludsod na kadagiti nagduduma nga ahensya ti gobierno nu kasta ket masiguro nga umniso metlaeng iti pannakagastar ti nasao a pondo.
Immapela pay ni Diokno kadagiti pada na a mamanday-linteg a suportaran ti gakat a mandatoryo a panangisuro mainaig ti West Philippine Sea para ti primary education, partikular kadagiti agtutubo.
Babaen ti kastoy a wagas ket ngumato ti puot da seknan kadagiti teritoryo ken karbengan ti Pilipinas idiay WPS nga agtultuloy a tagtagikuaen ti China.
