Nagdepensa ti Malakanyang seknan ti presensya dagiti US warships idiay West Philippine a nasaripatpatan asideg ti probinsya ti Zambales.
Kinuna ni Palace Press Officer Undersecretary Claire Castro a ti presensya dagiti dua a warship ti Estados Unidos ket maiyannurot iti international laws ken awan iti pakainaigan ti Pilipinas iti deployment dagiti barko ti US Navy.
Nasaripatpatan ti USS Higgins ken USS Cincinnati idi aldaw ti Mierkules, sumagmamano nga aldaw kalpasan a nagdinnungpar dagiti dua a Chinese vessels idiay Bajo de Masinloc gapo iti panangkamat da iti barko ti Philippine Coast Guard.
Maibasar iti damag manipud kenni Commodore Jay Tarriela ti Philippine Coast Guard, mangisaysayangkat laeng ti freedom of navigation operations dagiti barko ti Estados Unidos.
Nupay kasta, impaganetget manen ni Undersecretary Castro a saan a probokasyon ti araramiden ti Pilipinas nu ketdi ket mangdepdepensa laeng kadagiti agresibo nga aksyon ti China.
Kas panangsegunda iti waragawag ni Presidente Marcos, innayon na a saan a pulos nga umatras ti Pilipinas iti panangsalaknib kadagiti sovereign rights na iti mapagsusupiatan a teritoryo.
Saan metten a masdaaw iti opisyal kadagiti parparbo a naratibo ti China nga agtultuloy a mangpangpangta ditoy pagilian. Nu ketdi ket agtultuloy ti panagtignay ti Pilipinas iti napangabakan nga arbitral ruling a nagkuna a kukua ti pagilian iti West Philippine Sea.
