Mangipasdek iti Migrant Workers Office ti Department of Migrant Workers (DMW) idiay Abuja, Nigeria gapo iti panagngato dagiti Overseas Filipino Workers iti nasao a lugar.
Iti agdama ket nasrok 6K ti OFWs idiay Nigeria, malaksid pay dagiti sabali a Filipino workers kadagiti 12 a pagilian idiayu West ken Central Africa nga adda metlaeng iti hurisdiksyon ti Philippine Embassy idiay Abuja.
Segun kenni Migrant Workers Secretary Hans Leo Cacdac, panggep da a mapalawa pay ti presensya ti Pilipinas idiay Nigeria kasta met a maprotektaran dagiti mangmangged a Pilipino sadiay.
Nakitaripnong metten ni Philippine Ambassador to Nigeria a ni Mersole Mellejor kenda Nigerian Foreign Minister Yusuf Tuggar ken Labor Minister Dr. Muhammad Maigadi Dingyadi para ti panangpapigsa iti workforce sector, kasta met iti proteksyon, oportunidad, ken masakbayan ti labor market.
Pagaammo iti Nigeria kas maysa a kadakkelan a producer ti krudo ken natural gas ken dakkel iti akem na iti energy markets ditoy lubong. Mainaig iti daitoy ket manamnama pay ti panangala ti Nigeria kadagiti ad-adu pay a skilled ken semi-skilled Filipino workers nga agtrabaho iti pagilian da.
