Para ti kaunaan a gundaway manipud idi nagatang ti Estados Unidos ti Alaska manipud iti Imperio ti Ruso idi pay tawen 1867, maysa a presidente ti Russia ti opisyal aa bumisita ti nasao nga estado.
Agturong ni Russian President Vladimir Putin idiay Anchorage, Alaska tapno makitaripnong kenni U.S. President Donald Trump ti maysa a summit a panggep a dakamaten ti pannakarisut ti gyera da kontra Ukraine.
Ti panagpili ti estado ti Alaska kas lugar ti panagtaripnong ket addaan iti nauneg a simbolismo.
Aganay 158 a tawenen ti napalabas manipud iti ilako ti Russian Empire ti Alaska ti gatad a $7.2M, maysa nga addang nga inwagan idi dagiti kritiko kas “Seward’s Folly.”
Dakkel a biddut daitoy iti biang ti Imperio ti Ruso agsipud ta napaneknekan a napateg ti akem ti Alaska maipapan ti estratehiko a depensa ti Estados Unidos, kangrunaan na idi Cold War da kontra ti Soviet Union.
Maangay ti panagtaripnong idiay Joint Base Elmendorf-Richardson, maysa a military installation idiay Anchorage, Alaska ken segun kadagiti opisyal, dakamaten da Putin ken Trump ti kontrobersyal a “land swap” kas posible a paset ti katulagan tapno magun-oden ti kinakapia da iti Ukraine.
