BR LA UNION – Pagpalawagen ti Commission on Elections (COMELEC) dagiti uppat a kontraktor ti gobyerno a rimwar iti inisyal nga imbestigasyon a maipagarop a nag-donate a pangkampanya dagiti kandidato idi 2022 elections.
Patulodan ti surat iti poll body dagiti natakwatan a kontratista ti gobyerno.
Rimwar iti isyu kalpasan nga inbutaktak ni Presidente Ferdinand Marcos Jr. ken sumagmamano a senador dagiti maipagarop nga iregularidad iti flood control projects iti naduma-duma a paset ti pagilian.
Segun kenni Garcia, nakaawat ti poll body ti impormasyon nga adda sumagmamano a kontraktor ti gobyerno a nangipaay ti pondo iti sumagmamano a politiko.
Impaganetget na a nalawag a nakailanad iti Section 95 (c) ti Omnibus Election Code, a maipawil ti umawat ti kontribusyon manipud kadagiti indibidwal wenno kompanya nga adda kontrata na iti gobyerno para iti panangipaay ti goods, serbisyo, wenno panangipatungpal dagiti proyekto ken konstruksyon.
Inwaragawag ni Garcia a maki-koordinar da pay iti Department of Public Works ang Highways (DPWH) tapno kumpirmaren nu adda iti sidong da dagiti kontratista.
Inlawlawag ni Garcia nga iti agdama, adda sungsungbatan dagiti kontraktor a nangted ti kontribusyon, ngem saan pay a nalawag nu direkta a karaman dagiti kandidato a nakaawat ti pondo.
Nu mapaneknekan a nagbasol, mabalin a sumango iti election offense ti kontraktor gaputi panaglabsing iti Omnibus Election Code ken mabalud ti maysa agingga innem a tawen.
