BR LA UNION – Mamati ni Senate President Pro Tempore Jinggoy Estrada nga awan ti tumpuar a “ghost project” nu awan ti kooperasyon ti Commission on Audit (COA).
Segun iti senador, kasapolan a mapaayaban iti sumaruno a panagdengngeg ti Senate Blue Ribbon Committee dagiti opisyal ti ahensya tapno agpalawag kadagiti naanomalyaan a flood control projects ti gobyerno.
Idi Miyerkoles iti privilege speech ni Senador Ping Lacson, imbinglay na iti maysa a pie-sharing, nu kasatno a mabingay-bingay ti pondo para iti flood control projects, ket 0.5 to 1% ti map-mapan iti Commission on Audit.
Inrekomenda pay ni Estrada a “heads must roll” wenno adda rumbeng nga agsungbat iti mapas-pasamak a kinakusit kadagiti proyekto ti gobyerno.
Innayonna pay a posible nga adda sumagmamano nga empleyado ti Department of Public Works and Highways (DPWH) iti mangkor-korner dagiti kontrata para iti maysa a proyekto.
Nupay kasta, adda latta iti ima ni President Ferdinand Marcos Jr., nu ikkaten na wenno saan ni Secretary Manuel Bonoan.
Saan a mamati iti senador nga awan ti ammo ti sekretaryo kadagiti mapaspasamak iti sidong ti liderato na, kadagiti undersecretary, regional director, district engineer, ken dadduma pay.
