Kinumpirma ti opisina ni Batangas 1st District Representative Leandro Legarda Leviste nga adda ti maipila a kaso kontra kenni DPWH Batangas 1st District Engineer Abelardo Calalo iti Batangas Provincial Prosecutor inton bigat, Agosto 26.
Maipagarop a ginandat a pasuksukan ni Calalo iti kongresista tapno saanen nga ituloy iti imbestigasyon kadagiti flood control projects, kalpasan a natakwatan ni Leviste a substandard dagiti materyales, saan a nalagda, ken dagos a nadadael uray kaar-aramid na pay laeng idi napalabas a tawen.
Partikular a nadakamat ni Leviste ket dagiti proyekto iti Palico River, Binambang River, ken Pansipit River.
Impaganetget ti manmanaday-linteg a saan rumbeng a palubusan iti korapsyon ken kasapulan nga dagiti proyekto ket de kalidad. Rumbeng met nga obligaren dagiti contractor a dagos nga urnusen dagiti pagkurkurangan dagiti proyekto nga awan ti kanayunan a gastos manipud iti gobyerno.
Tarigagay ti representative iti nalawlawa a reporma tapno sungbatan dagiti parikut a nakairamot iti sistema ti ahensia malaksid pay iti maipila a kaso. #
