BR LA UNION – Indaulwan ni Department of Public Works and Highways (DPWH) Secretary Vince Dizon iti panangipila ti kaso a graft idiay Office of the Ombudsman ita nga aldaw, Setyembre 11, 2025 kontra iti 20 nga opisyal ti nasao nga ahensiya ken uppat a contractors a mairam-raman iti anomalya dagiti flood control projects.
Iti naisayangkat a press briefing, imbaga ni Secretary Vince Dizon, a dagiti respondents wenno nakaswan ket iti St. Timothy Construction Corporation a kukua ni Sara Discaya, Wawao Builders nga ibagbagi ni Mark Allan Arevalo, Syms Construction Trading ni Sally Santos, IM Construction Corporation nga ibagi ni Roberto Imperio, agraman da sigud a DPWH district engineer Henry Alcantara, ken sigud a Bulacan 1st district assistant engineers Brice Hernandez ken Jaypee Mendoza.
Dadduma pay a respondents ket dagiti DPWH officials nga isuda: John Michael Ramos, Ernesto Galang, Lorenzo Pagtalunan, Norberto Santos, Jaime Hernandez, Floralyn Simbulan, Juanito Mendoza, Roberto Roque, Jolo Tayao, Benedict Matarawan, Christina Mae Pineda, Paul Jayson Duya, Merg Laus, Jaron Laus Lemuel Roque, Arjay Domasig, John Carlo Rivera, John Francisco, ken John Does and Jane Does.
Segun kenni Dizon, dagiti kaso a naidatag ket non-bailable ken adda pakainaiganna kadagiti ghost projects, substandard a konstruksyon, ken kinnutsabo iti bidding process.
Maysa kadagiti nadakamat a kaso ket iti tallo a flood control projects idiay Oriental Mindoro a napondoan iti sidong ti 2025 General Appropriations Act.
Iti laksid ti milyon a pisos a pondo, awan ti aktwal nga istruktura ti naipatakder kadagiti karayan idiay Panggalan, Tubig, ken Catuiran.
Kiniddaw pay ni Dizon ti Immigration Lookout Bulletin Order (ILBO) kontra kenni sigud nga Undersecretary Roberto Bernardo, a maipagarop nga adda pakainaiganna kadagiti kuwestiyonable a proyekto.
Nairanta daytoy a lapdan iti posible nga ipapanaw ni Bernardo ditoy pagilian bayat nga agtultuloy iti imbestigasyon.
