BR LA UNION – Nakaballasiwen ti bagyo Mirasol iti Northern Luzon ken dup-dupagenna itan ti Kalinga.
Naudi a nakita ti sentro ti mata ti bagyo idiay bisinidad ti Tanudan, Kalinga.
Kabuyog ti angin a 55 kilometro kada oras asideg iti sentro ken kapegges a dumanon ti 70 kilometro kada oras.
Agtur-turong iti amianan-a-palaud iti kapartak a 15 kilometro kada oras.
Maibasar iti forecast track ti PAGASA, agturong met laeng iti Luzon Strait ti tropical depression ita a malem wenno inton rabii ken agtultuloy a dupagenna iti amianan-a-palaud agingga a rumwar iti Philippine Area of Responsibility inton bigat, September 18, iti bigat wenno malem.
Sakbay a rumwar iti PAR, posible a pumigsa ti bagyo Mirasol iti tropical storm category.
Agtaltalinaed a 17 a lugar dagiti nakapasidong iti SIgnal No. 1 gaputi bagyo Mirasol.
Dagitoy ket iti: Batanes, Cagayan, Babuyan Islands, Isabela, Quirino, Nueva Vizcaya, northern and central portions of Aurora, Apayao, Abra, Kalinga, Mountain Province, Ifugao, Benguet, Ilocos Norte, Ilocos Sur, La Union, northeastern portion of Pangasinan, ken northern portion ti Nueva Ecija.
Kabayatanna, maysa pay a low pressure area manipud iti daya ti Southern Luzon ti nabukel a tropical depression itay bigat, alas 8:00, segun iti PAGASA.
Naudi a nasaripatpatan daytoy iti kaadayu a 1,265 km daya ti Southern Luzon, kabuyog ti angin a 45 kilometro kada oras ken kapegges a dumanon ti 55 kilometro kada oras.
Agtur-turong iti laud, amianan-a-palaud iti kapartak a 10 kilometro kada oras.
Iti nasao a tropical depression ket namnamaen a sumrek iti Philippine Area of Responsibility inton rabii wenno inton bigat, Huwebes ket maawagan a bagyo Nando.
Mabalin a maingato ti signal no. 1 kadagiti lugar iti Northern Luzon inton Sabado, Setyembre 20.
Ti nasao a bagyo ket posible a dumanon iti typhoon category, agturong idiay Babuyan-Batanes area, inton Martes wenno Miyerkoles, sumaruno a lawas.
Segun iti PAGASA, posible a Signal No. 4 ti kangatuan a wind warning iti bagyo Nando.
