BR LA UNION – Nangipeksa ti sibubukel a suporta iti Department of Agrarian Reform (DAR) iti panangipatungpal ti Executive Order No. 100 ken Executive Order No. 101 a pinirmaan ni President Ferdinand R. Marcos Jr.
Segun iti ahensya, dakkel ti maitulong ti EO 100 ken EO 101 kadagiti agrarian reform beneficiaries (ARBs).
Impaganetget ti DAR nga adda mas nasay-sayaat ken maiparbeng a presyo ti palay ken dadduma pay a produkto agrikultural, a mangingato ti pamastrekan dagiti ARB ken mangpatibker iti merkado.
Maaddaan pay ti ad-adu a gundaway para iti grupo dagiti ARB a direkta a maka-ilako ti produkto da kadagiti ahensya ti gobyerno ken lokal a gobyerno.
Malaksid dayta, namnamaen pay ti naur-urnos a sistema iti post-harvest wenno kalpasan ti panagapit, pumigsa iti lokal a pagbiagan ken kooperatiba, a mangpartuat ti kanayunan a trabaho iti probinsiya.
Iti sidong ti EO 100, idaulwan ti Department of Agriculture (DA) iti panangdetermina ken panangbaliw iti kababaan a presyo (floor price) ti palay, tapno maprotektaran dagiti mannalon kontra iti pabaliw-baliw a presyo ken saan a patas a komersiyo.
Kabayatanna, nakailanad iti EO 101 iti naan-anay a panangipatungpal ti Republic Act 11321 wenno Sagip Saka Act, babaen ti Farmers and Fisherfolk Enterprise Development Program.
