LA UNION – Pakabuklan a 106 a mannalon wenno Agrarian Reform Beneficiaries (ARBs) ditoy La Union ti mabenipisyaran iti naibunong a Certificates of Condonation with Release of Mortgage (CoCRoM), iti sidong ti baro nga Agrarian Emancipation Act (NAEA).
Kaipapanan daytoy nga awanen ti bayadan nga utang iti daga dagiti nasao a mannalon, a kas iti unpaid amortizations, agraman interests ken surcharges.
Maipalagip a pinirmaan ni Presidente Ferdinand “Bongbong” Marcos Jr. iti Republic Act 11953 wenno Agrarian Emancipation Act idi July 7, 2023, tapno palag-anen iti biag dagiti agrarian reform beneficiaries a nagka-utang gaputa saan a naan-anay a libre ti daga a nai-award kadakuada, iti sidong ti Comprehensive Agrarian Reform Program (CARP).
![](https://img.bomboradyo.com/launion/2024/07/RAFY-1.jpg)
Personal nga inawat ni La Union Gov. Raphaelle Veronica “Rafy” Ortega-David iti nasao a certificate nga inyawat ni President Marcos idi Hulyo 19, 2024 idiay Narciso Ramos Gymnassium idiay Lingayen, Pangasinan.
Malaksid dayta, inawat pay ti gobernadora iti maysa a tseke nga agbalor ti ₱42.9-M nga Special Financial Assistance para kadagiti indibiduwal ken pamilya a naapektaran iti napalabas nga El Niño phenomenon.
Maibasar iti datus, pakabuklan a 4,290 a mannalon, mangngalap, livestock ken poultry owners a naapektaran ti El Niño ket umawat ti Php10,000 tunggal maysa.