BR LA UNION – Inwaragawag ni Department of Agriculture (DA) Secretary Francisco Tiu Laurel Jr. nga agtultuloy ti koordinasyon ti ahensya kadagiti sub-agency na tapno masungbatan iti pangta ti nakaru nga El Niño ditoy pagilian.
Inbilin ni Laurel iti National Food Authority (NFA) nga usarenna ti dakkel a paset ti badyet tapno agresibo a gumatang ken ag-stock iti palay ken bagas a mangpunno kadagiti bodegana, nangruna ket 40% laengen ti nabati nga apit ditoy pagilian, a nasken a magatang sakbay nga agpatingga ti panawen ti panagapit.
Sinigurado pay ti ahensiya a napunno dagiti cold storage facility para kadagiti dadduma a produkto ti agrikultura, bayat nga agtultuloy ti pannakaiwaras dagiti solar-powered irrigation pumps kadagiti lugar a pagtataudan ti danum tapno makissayan iti epekto ti dry spell.
Impasigurado ti sekretaryo nga agtalinaed ti panagtalek ti ahensiya, nga awan ti sapasap a panagkurang dagiti kangrunaan a tagilako iti merkado.
Kinunana a ti panagangkat wenno importation iti maudi a pamuspusan ti gobierno no mapasamak ti kinakurang ti lokal a produksiyon.
Mainaig iti pondo, nakaawat ti ahensiya iti P2.6 billion manipud iti kidkiddawen a P45-billion supplemental budget para iti dagus a pannakaipatungpal dagiti mitigating measures kontra iti krisis ken El Niño.
Namnamaen pay ti ahensya iti kanayunan a P10 billion para iti solar irrigation, pumps, ken bio-fertilizers, ken uray para iti Presidential Assistance to Farmers and Fisherfolks kas panagsagana ken tulong kadagiti mannalon ken mangngalap.
