Saan nga ikkaten ti Philippine Air Force (PAF) iti posibilidad a naaddaan ti human error iti panagsuwek ti maysa kadagiti uppat a Super Huey helicopter idiay Agusan del Sur idi kalman Martes, Nobyembre 4.
Segun kenni PAF Spokesperson Colonel Ma. Christina Basco, maysa daytoy kadagiti im-imbestigaran dagiti otoridad malaksid kadagiti dadduma pay a salik kas iti weather condition ken mechanical error.
Impaganetget ti Philippine Air Force a paset ti Standard Operating Procedure (SOP) iti panagammiris ti klima ken angin iti lugar sakbay nga ag-take off tapno masigurado nga agbalin a natalged iti panagbiahe dagiti personnel para iti panangisayangkat kadagiti bukod da nga operasion.
Kabayatanna, dua kadagiti innem a crew a sakay ti nasao a chopper iti padpadasen nga alaen dagiti pamilyada tapno maiyawid kadagiti probinsia idiay Mindanao, bayat nga uppat dagiti maiturong idiay Villamor Airbase.
Impasigurado met ti puersa pangtangatang nga dagiti pimmusay iti insidente ket maipaayan ti panangbigbig babaen ti maysa nga Heroes Honors gapo ti impamatmat da a laing ken tured a panagserbi kadagiti umili a Pilipino.###
