Nakasangpeten idiay Villamor Airbase, Pasay City iti bangkay dagiti uppat a miembro ti Philippine Air Force (PAF) a pimmusay gapo ti panagsuwek ti Super Huey helicopter idiay Loreto, Agusan Del Sur idi Nobyembre 4.
Indauluan ni PAF Commanding General, LtGen. Arthur Cordura, iti panangawat ken panangiaay ti Heroes Honor kada Captain Paulie Dumagan, Second Lieutenant Royce Louis Camigla, Sergeant John Christopher Golfo, ken Airman First Class Ericson Merico.
Sinabat met isuda dagiti pamiliada ken kakadua manipud ti 505th Search and Rescue Group.
Tunggal maysa ket nakaawat ti posthumous award ken distinguished aviation cross.
Impasigurado met ti PAF a maipaayan ti tulong dagiti naulila a pamilya, karaman ti sueldo a katukad ti innema bulan dagiti pimmusay a miembro.###
