Kinumpirma ti Philippine Air Force (PAF) iti panagsuwek ti dua kadagiti SF-260 basic trainer aircraft da, kalpasan nga agdinnungpar bayat nga adda iti tangatang kagiddan ti panangisayangkat ti training flight idiay Fernando Air Base, Lipa City, Batangas bandang alas-3:51 ti malem idi Biyernes, Oktubre 23.
Maibasar kadagiti umuna a report dagiti lokal nga otoridad, natay dagiti uppat a piloto a nakalugan ti eroplano, nupay agtultuloy pay iti beripikasyon ken awan pay ti opisyal a waragawag ti PAF mainaig iti kasasaad da.
Dagus met a nangi-deploy ti response team iti PAF tapnu i-secure iti lugar ti aksidente, rugian iti imbestigasyon, ken siguradoen a natalged iti kameng kas dagiti residente nga asideg iti nakapasamakan daitoy.
Dagiti karaman nga aircraft ket mapapati a dagiti maudi a bersyon ti SF-260FH a nagatang iti sidong ti administrasyon nga Arroyo ken naideliber idi nangrugi ti administrasyon nga Aquino.
Agtaltalinaed a nakapamaysa iti liderato ti PAF iti nainget nga imbestigasyon bayat nga ipangpangruna iti seguridad ken kasasaad dagiti naapektaran ti tragic incident.
