Dumanon ti 82 iti bilang dagiti Overseas Filipino Workers (OFW) a naammuan nga agnanaed wenno agtartrabaho iti Wang Fuk Court Housing, maibasar kadagiti baro a datos nga inruar ni Philippine Consul General Romulo Israel Jr.
Ti nasao nga housing complex idiay Hong Kong ket nauram idi Mierkoles (Nov. 26) a nakatayan ti saan a bumaba ti 83 a tattao bayat nga adu pay dagiti agdama a masapsapol
Manipud iti nasurok 80 a Pilipino, nasurok 20 kadagitoy iti nasurot ken nakasarita ti konsulada kalpasan ti insidente, bayat nga agtultuloy iti koordinasion kadagiti dadduma tapno maammuan ti kasasaadda.
Inlawlawag ni Israel Jr. a sumagmamano kadakuada ket posible a naka-rehistro iti complex ngem saandan nga agtaltalnaed ditoy wenno pimmanawen.
Iberberipika met ti konsulada iti record dagiti amin a 82 nga OFW ken no sadino iti nagturungan dagiti sumagmamano kanyada – a mabalin nga immalis da ti trabaho wenno pagnaedan.
Segun kenni Israel Jr., regular a mangiruruar ti impormasion iti Hong Kong authorites, kas iti bilang dagiti pimmusay, pakabigbigan, nationality, ken dadduma pay.
Iti agdama, awan ti report no adda dagiti Pilipino a nairaman iti listaan dagiti natay, ngem agtultuloy iti panagsapul dagiti otoridad iti sibubukel a pasdek kalpasan a naideklara a fire out.#
