LA UNION – Dead on arrival iti maysa kadagiti biktima ken ti mismo a suspek iti napasamak a pammaltog idiay Barangay Nalasin, Balaoan idi Disiembre 3, 2025.
Nabigbig dagiti biktima a maysa a 62-anyos, balo, awanan trabaho, ken ti maysa a menor de edad a babai. Bayat nga iti suspek ket maysa a lalaki, agtawen ti 49, naasawaan, ken awanan trabaho. Agpapada da a residente ti nasao a lugar.
Maibasar iti inisial nga imbestigasion ti pulisia, bigat ti Disiembre 2 idi maipagarup a pinadas ti suspek nga umutang ti kuarta manipud iti ikit na (ti biktima), ngem nagkedked daytoy a mangipabulod gapo ti personal a rason.
Agarop alas-9 ti rabii idi Disiembre 3, kinomprontar ti suspek dagiti biktima a madama nga adda iti balkonahe ken direkta nga insawangna iti menor de edad a biktima a “Haan nga agin kokonsehal ni nanang mo” sakbay na a pinaltugan isuda.
Kalpasan ti krimen nagturong daytoy iti likudan ti balay ken pinaltugan iti bukod na a bagi.
Naiturong dagiti biktima ken suspek idiay Balaoan District Hospital para iti medikal a pannakataming, ngem naiproklama a dead on arrival iti 62-anyos a biktima ken ti suspek babaen iti attending physician a ni Dr. Agustin Washington, bayat nga iti menor de edad ket naiturong iti Ilocos Training and Regional Medical Center para iti naan-anay a pannakaagas.
Kabayatanna, narekobre met iti paltog nga inusar ti suspek iti abayna ken nabigbig kas Cal. 9mm Armscor.
Nagkiddaw met ti tulong dagiti personnel ti Balaoan MPS iti SOCO para iti panangproseso ti nakapasamakan ti krimen.#
