BR LA UNION – Kinumpirma ni Department of the Interior and Local Government (DILG) Secretary Jonvic Remulla ita nga aldaw ti Sabado, Disyembre 20 a bangkay ni sigud a Department of Public Works and Highways (DPWH) USec. Catalina Cabral ti nasarakan iti rangkis idiay Tuba, Benguet Province.
Segun iti sekretaryo, ti makagapo ti pannakatay ti sigud nga opisyal ket “blunt force trauma consistent with a fall.”
Kinumpirma ti sekretaryo iti nasao a findings a mangipakpakita nga awan ti nakita a sugat manipud iti tama ti bala wenno dadduma pay nga indikasyon ti foul play.
Dagiti sinagrap nga injuries ti sigud nga opisyal ket gapwanan ti pannakatinnag na manipud iti nangato a lugar.
Inwaragawag pay ni Sec. Remulla a nakatuding nga iturn-over ti asawa ni Cabral dagiti personal belongings na kadagiti imbestigador kalpasan a maitabon ti sigud nga opisyal.
Ni Cabral ket maysa kadagiti napateg a personalidad a mairam-raman iti nalawa a corruption scandal seknan iti flood control projects idiay Bulacan.
Nasarakan a natay ni Cabral kalpasan a maipagarop a natinnag iti nauneg a derra-as asideg idiay Bued River idiay Kennon Road, Tuba, Benguet idi rabii ti Huwebes, Disyembre 18.
