BR LA UNION – Nangisayangkat ti search operation dagiti operatiba ti National Bureau of Investigation-Cordillera Administrative Region iti hotel idiay Baguio City a naudi a nagdagusan ni sigud a Department of Public Works and Highways (DPWH) Undersecretary Maria Catalina Cabral sakbay a natay.
Iti maysa a Facebook post, imbaga ti NBI a sinukimat dagiti ahente da iti kuwarto ni Cabral, iti bileg ti search warrant nga inyisyu ni Regional Trial Court–Baguio City Branch 6 Judge Michael Francisco.
Pinalubosan ti korte nga alaen dagiti ebidensiya a mabalin a makatulong iti pannakalawag ti pasamak seknan iti pannakatay ni Cabral.
Segun iti NBI, nakasentro ti operasyon iti panang-secure iti rekord ken dadduma pay a materyales nga adda pakainaiganna iti agtultuloy nga imbestigasyon.
Nagpanawagan met dagiti otoridad kadagiti motorista a dimmalan idiay Kennon Road idi Disyembre 18 nga agsumite ti dashcam footage a mabalin a makatulong iti imbestigasyon, iti tengnga ti nagduduma nga espekulasyon.
