BR LA UNION – Nawayawayaanen dagiti nabati a 130 nga ubbing nga estudyante a dinukot dagiti armado a grupo manipud iti Catholic school idiay Nigeria idi Nobyembre.
Kinumpirma daytoy ni Presidential spokesman Sunday Dare, kagiddan ti panangiruar na iti ladawan dagiti ubbing kas pammaneknek a nawayawayaanda.
Immuna a nakidnap dagiti estudiyante idi napan a bulan idi rinaut dagiti armado a bandido ti St. Mary’s Private Catholic School.
Pakabuklan a 303 nga ubbing ti nakidnap, a kaadwan ket agtawen pay laeng ti 10, agraman ti 12 a mangisursuro.
Agarup 50 nga estudyante ti nakalibas ken nagsubli kadagiti pamilyada bayat nga insalbar ti security forces ti Nigeria ti 100 kadagiti nakidnap a biktima.
Ti napasamak a panagdukot idi Nobyembre ti kaudian iti agsasaruno a panagraut dagiti armado a grupo kadagiti sibilyan, nangruna kadagiti eskuelaan a pangisay-sayangkat da ti nasaknap a panagkidnap para iti ransom.
