Natay iti umuna nga aldaw ti tawen 2026 ti suspek iti New Year grenade blast idiay Cotabato a nakadunoran dagiti 22 a tattao.
Babaen ti hot pursuit operation ti rabii ti Enero 1 ket napatay dagiti otoridad ti suspek a nangipurwak ti granada iti panagsarabo ti baro a tawen idiay Barangay Dalapitan, Matalam, Cotabato. Naigbig daitoy a ni Hammad Ansa, 40-anyos, addaan asawa, ken residente ti Purok 6, Barangay Kilada, Matalam, Cotabato.
Iti pannakiuman ti Bombo Radyo GenSan ket pinasingkedan ni Police Brigadier General Arnold Ardiente, Regional Director ti Police Regional Office 12, a limmaban gamin ni Hammad isu a napilitan dagiti pulis a bumales iti putok.
Kabayatanna, nainget metten ti seguridad iti lugar bayat a mabirbirok paylaeng ti maysa pay a suspek iti insidente. Saan pay a masinunuo ita ti motibo dagiti dua iti krimen ngem kumpirmado a ti suspek ket adda pakainaigan da iti panaglakoan ti ilegal a droga.
Segun kenni Ardiente, posible a ti inaramid dagitoy ket panangibales iti operasyon nga inyuswat ti Cotabato Provincial Police Office kontra iti grupo da.
