BR LA UNION – Nakailista iti Department of Health – Ilocos Region (DOH-1) ti 78 a fireworks-related injuries (FWRIs) manipud Disyembre 21 agingga 31, 2025.
Daytoy ket nangatngato ti 2.6 percent kumpara iti 76 a kaso ti kapada a panawen idi 2024.
Maibasar iti kauddian a datus ti Regional Epidemiology and Surveillance Data ti DOH-1, ti kangrunaan a makagapo iti pannakadangran ket dagiti iligal a paputok a five star, kwitis, ken boga.
Kaadwan a madangdangran ket dagiti ubbing ken agtutubo nga agtawen ti tallo agingga 14-anyos ken kaadwan a biktima ket lallaki.
Posible a manayunan ti nasao a bilang agsipudta nakailista ti Region 1 Medical Center (R1MC) idiay Dagupan City, Pangasinan iti 18 a baro a kaso idi rabii ti Baro a Tawen agingga bigat ti Enero uno, 2026.
Agparparang iti datus ti ospital, nga agtawen ti tallo iti kaubingan a biktima ken 45-anyos ti kalakayan.
Kaadwan a pasyente ket naggapo idiay Dagupan City (10 patients), sumarsaruno ti Mangaldan, San Fabian, ken San Carlos City nga addaan ti uppat a kaso tunggal maysa, bayat a sagdu-dua idiay Binmaley, Sto. Tomas, ken Alaminos City ken maysa manipud Bani.
Kadagiti amin a biktima idiay Pangasinan, 20 iti na-classify kas passive victims wenno limmabas laeng a naputukan ti palibang.
Bayat a siyam (9) dagiti maibilang nga active users wenno isuda mismo ti nagiggem ken nagsindi ti paputok.
Kinumpirma pay ti nasao nga ospital a dua a pasyente da iti naputdan ti ramay gaputi nakaru a pannakadunor.
Agtalinaed ti Code White status dagiti ospital ti DOH agingga Enero 6, 2026 para iti agtultuloy a panagmonitor kadagiti kaso ti fireworks injuries iti sidong ti Oplan Iwas Paputok.
