Indauluan ti Department of Health (DOH) Ilocos Center for Health Development, kadua ti Department of Social Welfare and Development (DSWD) Field Office I, Lokal a Gobierno ti Sto. Tomas, ken dagiti opisiales ti Barangay Tubod, iti panagrambak ti National Cardiopulmonary Resuscitation (CPR) Day 2026 babaen ti information campaign ken hands-on demonstration ti Hands-Only CPR, ita nga aldaw, Hulyo 17, idiay Barangay Tubod, Sto. Tomas, La Union.
Iti aktibidad ket dinar-ayan ti ginasut a benepisiaryo ti Pantawid Pamilyang Pilipino Program (4Ps) kas paset iti paggep ti DOH a palawaen iti ammo dagiti komunidad iti umno a panagsungbat kadagiti emerhensia, kangrunaan kadagiti kaso ti cardiac arrest.
Inadauluan daytoy da Dr. Magnolia Brabante, Medical Officer IV ken DOH Regional DRRM-H Manager; Dr. John Benedick C. Carbonell, Municipal Health Officer ti Sto. Tomas; Anniely J. Ferrer, Assistant Regional Director ti DSWD Field Office I; ken Ronald V. Punio, DSWD Provincial Link ti Provincial Operations Office–La Union. Nangiyusuat da ti diskusion ken aktual a demonstrasion iti umno a panangisayangkat ti Hands-Only CPR tapno mapasayaat iti kabaelan dagiti nakipaset iti panangipaay ti first aid.
Segun kenni Dr. Brabante, panggep ti DOH a masuruan ti tunggal pamilya ti saan a bumaba ti maysa a miembro nga addaan ti umdas a ammona iti life-saving skills tapno makaipaay ti dagos a tulong bayat a maur-uray iti panagsangpet dagiti propesional nga health responder.
Kenunana a nupay kadawyan a maisaysayangkat dagiti panagsanay iti CPR kadagiti pagadalan kas maitunos iti Republic Act No. 10871, daytoy ti kaunaan a gundaway nga inyasideg ti ahensia iti programa iti lebel ti barangay babaen iti pannakitinnulong iti DSWD.
Manamnama a mapalawa pay iti inisiatiba kadagiti dadduma pay a komunidad kas paset ti tinawen a panagrambak ti National CPR Day.
Inpaganetget na pay nga agtultuloy a palawaen ti DOH dagiti programa a mangisuro dagiti kabaelan a makasalakan ti biag tapno ad-adda nga agbalin a nakasagana dagiti komunidad iti panagsungbat kadagiti emerhensia, kagiddan ti panawagan ti nadumaduma a sektor a suportaran dagiti inisiatiba a mangitantandudo ti kinatalged ken kinasagana dagiti umili.###
