Nagpakdaar ti Department of Health (DOH) kontra iti peggad ti formaldehyde ken dadduma pay a makasabidong a kemikal a mabalin a masarakan kadagiti produkto a vape gapu iti dakes nga epekto iti salun-at.
Impalagip ti DOH a ti formaldehyde, ket maysa a kemikal a maus-usar iti dadduma a produkto ti industria ken iti embalming, ken mabalin a maakairita kadagiti mata, agong ken karabukob.
Ti napaut a pannakaisarang iti formaldehyde ket nainaig met iti ad-adu a peggad iti kanser.
Mainayon pay, ti vape aerosol ket mabalin nga aglaon iti dadduma pay a napeggad a substansia, agraman ti acrolein ken dadduma a metal a kas iti cadmium. Mabalin met nga addaan daytoy ti diacetyl.
Gapu iti daytoy, maipalagip iti publiko a saan nga ibilang a natalged ti panagusar iti vape gapu laeng ta awan ti asuk nga agtaud iti tabako.
Kanayon a maparegta ti publiko, nangruna dagiti agtutubo, a liklikan ti panagusar kadagiti vapes ken dadduma pay a produkto nga addaan iti nikotina gapu kadagiti peggad iti salun-at.
Mabalakadan met dagiti agus-usar iti vape nga agpakonsulta iti kualipikado nga health professional no kayatda nga isardeng ti panagusar iti daytoy.
