Impangato ti Department of Health (DOH) ti Code White Alert dagiti ospital ken Health Emergency Response Teams (HERTs) idiay Metro Manila manipud ita nga aldaw ti Sabado, Oktubre 31 agingga Nobiembre 2 kas panagsagana iti posible a panagadu dagiti pasiente a kasapulan ti dagus a medikal nga atension ita nga Undas.
Segun iti DOH-Metro Manila Center for Health Development, nakasagana met ti Operations Center-da tapno masigurado ti alisto a koordinasion ken pannakaireport dagiti emerhensia ken dadduma pay nga insidente iti rehion.
Kagiddan daitoy, mabalakadan ti publiko nga agbuggo kadagiti imada wenno agusar iti sanitizer nga alcohol-based, abbongan ti ngiwat ken agong no aguyek, ken mangitugot iti umdas a danum nga inumen tapno saan a ma-dehydrate.
Binilinan met dagiti addaan iti rikrinaen a sakit nga iyegda ken inumenda dagiti maintenance medicines-da iti umno nga oras bayat ti panagpasiarda kadagiti sementerio.
