Nakabantay iti Philippine Ports Authority (PPA) ken Philippine Coast Guard (PCG) iti posible panaggundaway dagiti fixer iti ginasuto a ribu a pasahero ita nga Undas, segun kenni PPA Spokesperson Eunice Samonte.
Segun kenni Samonte, adda iti im-imbestigaran ti Philippine Coast Guard nga insidente ti fixing nga immuna a napasamak idiay Batangas Port itay kallabes, ken sumangsango itan ti agtutuon a kaso dagiti mairam-raman a personalidad.
Maipagarop a nagpammarang dagitoy nga aglaklako iti lehitimo ken nalaklaka a presyo a tiket kadagiti pasahero nga agturong iti probinsiya.
Naipadamag nga idiay-diaya da ti nalaklaka a tiket, ngem apaman nga umanamong dagiti pasahero a gumatang, mas nangin-ngina a presyo ti tiket iti ilako da, nangruna kadagiti desperado nga agawid ken makabiyahe.
Para ita nga Undas 2026, ikag-kagumaan ti Philippine Ports Authority (PPA) ken Philippine Coast Guard a malapdan ti pannakapasamak dagiti umasping nga insidente, a mangsigurado a saan a mabiktima dagiti agbibiahe iti nasao a klase ti modus.
Segun kenni Samonte, awan pay ti nairekord wenno naireport kadakuada nga umasping nga insidente agingga iti agdama.
Iti intero a panawen ti Undas, namnamaen ti Philippine Ports Authority nga umabot iti 1.93 milyon a pasahero wenno nasursurok pay ti agturong kadagiti sangladan tapno agbiyahe.
Ti nasao a bilang ket mabalin a manayunan wenno makissayan, ngem dagiti sangladan ket nakasagana nga umawat ken mangpadagus kadagiti agbibiahe manipud idi nagrugi ti panawen ti Undas agingga iti panagsublida idiay Metro Manila ken dagiti dadduma pay a kangrunaan a siyudad.
Iti projection a 1.93 milion para ita a tawen ket dandani dua a porsiyento a nangatngato ngem iti aktual a bilang a nairekord idi napan a tawen.
