Dagus nga immandar ni Philippine National Police (PNP) chief General Jose Melencio Nartatez Jr. ti pannakaikkatg iti serbisyo dagiti innem a pulis a mairam-raman iti robbery holdap idiay Caloocan City.
Napasamak ti insidente idi rabii ti Nobyembre 16, a ti biktima ket maysa a sibilyan ken pulis a patrolman ti ranggo na.
Umabot iti P1.2 milyon iti pakabuklan a balor nga innala dagiti suspek a pakaibilangan ti motorsiklo, tallo a cellphone, issued firearm ti pulis a biktima ken balitok a bracelet a maipagarop nga agbalor ti P700,000.
Natiliw dagiti nagresponde a pulis iti maysa a suspek a naamwan a maysa a police major idinto a nakalibas ti dadduma.
Segun kenni PBGeneral Allen Rae Co, hepe ti Public Information Office (PIO) ti PNP, mangisay-sayangkat dagiti otoridad ti manhunt operation para iti pannaka-arestar dagiti naglibas a suspek.
Sumagmamano kadagiti suspek ket mairam-raman iti nagduduma a krimen ditoy pagilian.











