Saan a napawilan ni Sen. Raffy Tulfo a makapungtot kadagiti sumagmamano nga opisyales ti New Ninoy Aquino International Airport Infra Corp. ken Manila International Airport Authority (MIAA) gapu iti saan nga aggangana a Closed Circuit Television (CCTV) camera iti nadakamat nga airport.
Iti panagdengngeg ti Senate Committee on Public Services, inadmitir dagiti opisyales manipud MIAA ken NNIC nga adda sumagmamano a non-functioning CCTV cameras.
Dagus a bimmwelta ni Sen. Raffy a ti pannakaikabil dagiti nasao a camera ket awan serserbina a kasla panangloko iti publiko.
Inlawlawag met dagiti otoridad a sumagmamano laeng ti saan nga aggangana ngem segun kenni Sen. Tulfo, saan latta a maakseptar daytoy agsipud ta awan ti espasio iti aniaman nga airport a kasapulan a mabaybay-an.
Binilinna pay dagiti opisiales ti nasao nga airport nga inton bigat (Okt. 29) ket rumbeng nga ag-operate dagiti CCTV, nangruna ita ta umasidegen ti Undas.
Kinunana a sigurado nga adda dagiti tattao a manggundaway, wenno agtakaw kadagiti panagtitipon ti publiko, nangruna no ammoda a saan nga aggungunay ti sumagmamano a CCTV camera.
