Arestado iti maysa a 50-anyos a pasahero idiay Ninoy Aquino International Airport (NAIA) Terminal 1 idi Martes, Nobyembre 10, kalpasan a nag-bomb joke.
Segun iti PNP Aviation Security Group (PNP-AVSECG), agturong koma idiay Hong Kong ti pasahero idi inyangaw na ti bomba bayat nga agpal-palawag ti sumagmamano a restriksyon iti dangerous goods and electronic devices ti maysa nga airline passenger service agent.
Maipagarop nga imbaga ti lalaki a, “Bomba, may bomba yan,” rason tapno mangisayangkat dagiti otoridad ti imbestigasyon, kadwa da ti Explosive Ordinance Disposal (EOD) team.
Nupay awan ti nakita nga anyaman a klase ti explosives wenno incendiary materials iti bagahe ti pasahero kalpasan a mainspeksyon, inarestar latta dagiti pulis ken impasidong da iti NAIA Police Station 1.
Isagsaganan dagiti otoridad ti maidatag a reklamo kontra iti nasao a pasahero gaputi panaglabsing iti Presidential Decree No. 1727 wenno Anti-Bomb Joke Law.
