Naitantan ti 10 a flights idiay Europe kalpasan a makaawat ti bomb threats idi Martes, Nobyembre 3, a nangigubuay ti aberya kadagiti sumagmamano nga eropuerto, karaman iti temporario a panangiserra ti maysa nga airport idiay Warsaw, Poland.
Kakaruan a naapektaran iti Irish-owned budget airline a Ryanair, kalpasan a makaawat ti bomb threats dagiti uppat da a flights nga agturong ti nadumaduma a destinasyon.
Segun iti Metropolitan Police ti London, karaman kadagiti flight a nakaawat ti pangta dagiti nakaituding nga agtayab ken ag-landing idiay Heathrow Airport, maysa kadagiti “busiest airport” ti Europe.
Kabayatanna, nangiwaras dagiti air force fighter jet iti Italy tapnu i-escort iti maysa a Ryanair flight manipud Dublin a nakaituding nga ag-landing idiay Rome-Fiumicino Airport.
Dua met a flights nga agturong iti Warsaw iti naipadamag a nakaawat ti bomb threats—maysa idiay Scandinavian Airlines flight manipud Copenhagen ken maysa idiay LOT flight manipud Heathrow.
Laksid kadagiti pangta, awan iti nakita nga explosives kadagiti eroplano ken eropuerto kalpasan a mangisayangkat ti nauneg a panagsukimat dagiti otoridad.
