Imbutaktak ni Department of Justice Secretary Jesus Crispin ‘Boying’ Remulla iti lokasion ni Ako Bicol Party-list Rep. Zaldy Co.
Segun kenni Justice Secretary Remulla, agdama nga adda idiay Europa iti kongresista kas maibasar iti impormasion a maaw-awat da ken posible nga iti pagilian nga Spain wenno France.
Iti agangay ket tinakderan na nga adda idiay France ti manmanday-linteg kalpasan a pimmanaw ditoy pagilian para iti maipagarop a medical concern.
Pinasingkedan met ti Justice Secretary a napaulogan iti manmanday-linteg ti Immigration Lookout, isuta nakabantay wenno nakamonitor iti panagsubli ken panagruar ni Co ditoy pagilian.
Malaksid iti Immigration Lookout ket agkiddaw da metten iti INTERPOL wenno International Police Criminal Organization tapno mangiruar ti Blue Notice.
Panggep daytoy a makakalap wenno maipaayan isuda ti impormasion maipanggep iti sigurado a lokasion ken garaw ni Congressman Zaldy Co.###
