BR LA UNION – Agarop 1,200 a residente ken turista ti naiyakar kalpasan a timpuar ti dakkel nga uram iti kabakiran iti sumagmamano a coastal city idiay Croatia, a nakatayan ti maysa a tao.
Karaman kadagiti naiyakar ket dagiti Overseas Filipino Workers (OFWs) nga agnanaed ken agtrabtrabaho idiay Omiš.
Naipadamag a nangrugi ti uram idi rabii ti Huwebes idiay Lokva Rogoznica ket nagsaknap a nagturong iti asideg a tourist town nga Omiš, sumagmamano laeng a kilometro ti kaadayu na.
Mapattapatta a 1,000 nga ektarya a daga ti nauram iti las-ud laeng ti uppat nga oras, gaputi napigsa nga angin a nangpapartak ti panagwaras ti uram iti kabakiran.
Segun kenni Croatian Prime Minister Andrej Plenkovic, agarup 10 a tattao ti adda iti intensive care unit manipud iti 40 a nasugatan iti uram.
Nupay nakissayanen ti uram, agtaltalinaed a nabara iti kabakiran ken adu pay laeng a lugar ti awanan iti koryente.
Agtultuloy a mapaspasaran ti Croatia ken dadduma a paset ti Europa ti nakaro nga uram gapu iti epekto ti heatwave.
Kabayatanna, agtultuloy ti panangala ti impormasyon ti Bombo Radyo iti kanayunan nga impormasyon manipud iti Philippine Embassy idiay Vienna.
