BR LA UNION – Kiniddaw ti International Criminal Court (ICC) prosecutors a mairaman dagiti tallo a kanayunan a testimoniya dagiti witness kontra kenni sigud a presidente Rodrigo Duterte.
Daytoy ket nasurok maysa a bulan sakbay ti manamnama a panagrugi ti panagusig iti kaso ti sigud a presidente a crimes against humanity.
Ingkalintegan ti prosecution, a dagiti kanayunan a testimoniya ket manamnama a makatulong tapno maawatan ken maiplastar dagiti maipagarop a naipatungpal idi a ‘polisiya’ a nangpuntirya kadagiti drug suspect babaen ti kinadamsak agraman iti murder.
Kabilang a kidkiddawen ti prosecution iti testimoniya dagiti testigo a nabigbig laeng iti tag name nga P-1370, P-1393, ken P-1416.
Iti testimoniya dagitoy ket maitunos iti supporting documents a mausar kas ebidensiya kasukat ti ‘live testimony’ iti korte.
Inlawlawag pay ti prosecution, a ti account dagiti tallo a baro a testigo ket agrikos laeng iti ammo da seknan iti maipagarop a napasamak nga extrajudicial killings idiay Central Luzon ken mausar a pammatalged iti alegasyon a nakaaramid ti sigud a presidente ti crimes against humanity.
Nupay limitado laeng iti iruruar ti korte a detalye kadagiti bukodda a testigo, nakailanad ditoy a ni P-1393 ket adda ammo na seknan iti panangpatay ti maysa a police officer iti maysa a mayor idiay San Jose del Monte City, Bulacan.
Tinakderan met ti prosecution a ti panang-admit kadagiti nasao a testimoniya ket saan a makadadael iti karbengan ti sigud a presidente ken mabalin laeng a kuwestiyunaran ti legal team iti panagtulid ti panagusig.
