BR LA UNION – Tallo a Pilipino ti inaresto dagiti otoridad idiay Ninoy Aquino International Airport (NAIA) Terminal 3 idiay Pasay City kalpasan a madiskubre a nagimet dagitoy ti maatap a marijuana wenno kush idi Setyembre 24, 2026.
Narekober dagiti otoridad ti mapatta-patta a 18,679 gramo ti maatap a marijuana, addaan ti estimated value nga P18,679,000.
Iti insayangkat nga operasyon ti NAIA Inter-Agency Drug Interdiction Task Group, kadwa da ti Philippine Drug Enforcement Agency (PDEA) ken dadduma pay nga ahensiya, suma-total nga innem a bagahe a naglaun ti marijuana kush iti nakumpiskar ken naikarga dagitoy iti self-sealing foil pouches ken vacuum-sealed transparent plastic bags.
Maibasar iti imbestigasyon, naggapo dagiti tallo a suspek idiay Bangkok, Thailand sakbay da a nalapdan idiay terminal.
Dagiti suspek ket sumangsango iti kaso a panaglabsing iti Republic Act No. 9165 wenno Comprehensive Dangerous Drugs Act of 2002.
