Pinasingkedan ti Department of Migrant Workers (DMW) a maipasidong iti quarantine idiay Rotterdam, Netherlands dagiti 38 a Filipino seafarers a naglugan iti MV Hondius a nakaptan ti hantavirus sakbay a maiyawidda ditoy Pilipinas.
Segun kenni DMW Secretary Hans Leo Cacdac, uppat a tripulante ti naiturong idiay Netherlands idi Domingo, Mayo 10, idinto a 20 pay dagiti sumaruno.
Ti nabati a 14 deck ken engine crew ket makikadua iti barko nga agturong idiay Rotterdam.
Kenuna ni Health Secretary Ted Herbosa nga 42 nga aldaw ti quarantine protocol ken maipasidong pay iti testing dagiti crew sakbay a mapalubosanda a makaawid.
Adda iti nasayaat a kondision dagiti Filipino crew ken nagnegatibo iti virus.
Impasigurado pay ti DMW nga agtalinaed nga aktibo iti kontrata dagiti seafarers ken agtultuloy ti sueldoda kabayatan a naka-quarantine, idinto a saguten ti shipowner iti amin a gastos idiay Netherlands.
Maipalagip a tallo a tattao ti natay iti outbreak ti hantavirus iti barko, pakairamanan dagiti agassawa a Dutch ken maysa a German national.
Segun kadagiti health officials, nababa iti peggad daytoy iti global health ken saan a maidilig iti COVID-19 pandemic.
Maibasar iti epidemiology bureau ti Department of Health (DOH), awan pay ti nairekord a kaso ti hantavirus ditoy Pilipinas.
Pinunas ni Herbosa iti panagbuteng ti posibilidad ti kabaruan a COVID-19 pandemic gapu kadagiti naipadamag a kaso ti hantavirus.###
