Indeklara ti World Health Organization (WHO) iti panagpatingga ti panagraira ti hantavirus a nainaig iti cruise ship kalpasan a nakompleto ti quarantine ti naudi a naisarang iti nasao a sakit ken nagnegatibo iti virus.
Segun iti WHO, 13 a tattao ti naimpektaran idinto a tallo ti natay iti outbreak a naikonektar iti Andes virus, maysa a naidumduma a klase ti hantavirus a gagangay a masarakan idiay Argentina ken Chile.
Nangrugi iti insidente kalpasan a nagbiyahe ti cruise ship nga MV Hondius manipud Argentina idi Abril 1.
Kinuna ti WHO nga awan pay ti nairekord a baro a kaso kalpasan ti monitoring ken quarantine dagiti na-expose iti virus.
Ti hantavirus ket maipaspasa iti tao babaen ti pannakaisarang iti isbo, ibleng wenno katay dagiti naimpektaran a marabutit ken mabalin a pakaigapuan ti nakaro a respiratory illness.###
