BR LA UNION – Umaboten iti uppat a Pilipino ti naipadamag a nasugatan iti napasamak nga explosion wenno missile strike iti King Khalid International Airport idiay Riyadh, Saudi Arabia idi Sabado, Oktubre 10.
Tallo kadagiti uppat a nasugatan ket agtaltalinaed iti Intensive Care Unit (ICU) bayat a ti maysa ket nakatuding a ma-discharge iti ospital, maibasar iti inruar a waragawag ti Department of Migrant Workers (DMW) ita nga aldaw ti Domingo, Oktubre 11.
Awan ti nailista a Pilipino a natay iti nasao a panagraut.
Iti pakabuklan, 12 a tattao ti natay ken 309 dagiti nadundunor iti panagraut dagiti rebelde a Houthi idiay King Khalid International Airport idiay Riyadh idi Sabado.
Segun met kenni Labor Attaché Dominador Salanga ti Migrant Workers Office (MWO) idiay Riyadh, kadwa da pay ti Workers Welfare Administration (OWWA), agtultuloy a naka-asistir dagitoy iti kasapolan dagiti nasugatan bayat ti panag-paimbag da iti naduma-duma nga ospital.
Innayon pay ni Salanga, maki-koordinar pay ti opisina da kadagiti lokal nga otoridad ken iti ospital idiay Riyadh tapno kumpirmaren nu adda pay ti sabali a Pilipino a nasugatan manipud iti nasao a panagraut.
Binalakadan ti ahensiya dagiti OFWs idiay Saudi Arabia a lumisi pay laeng kadagiti lugar a mabalin nga agbalin a target ti panagatake, ken sumurot kadagiti anunsyo ti embahada, konsulado, Migrant Workers Office idiay Saudi Arabia, ken iti opisyal a social media page ti gobyerno para kadagiti update.
Para met kadagiti OFWs a nakatuding nga agawid ditoy pagilian, iyaw-awis ti ahensiya a tumawag iti airline sakbay nga agturong iti airport ken ugalien ti ag-check iti e-mail nga inusar ti panag-book, ken email dagiti employer.
Nag-abiso pay ti ahensiya a liklikan ti agala ti video wenno ladawan iti nasao a panagatake wenno ag-post iti social media agsipudta mailabsing daytoy iti linteg idiay Saudi Arabia.
