Nakasublin ditoy Pilipinas ti umuna a grupo ti 34 nga overseas Filipino workers (OFWs) a naggapu iti Saudi Arabia kalpasan a tinulongan ti Overseas Workers Welfare Administration (OWWA) ken Department of Migrant Workers (DMW) a mangurnos iti panagdaliasatda gapu iti pannakakanselar ken pannaka-delay dagiti flight idiay Riyadh.
Simmangpet dagiti OFW iti Ninoy Aquino International Airport (NAIA) Terminal 3 ita nga aldaw ti Lunes, Oktubre 19, babaen ti Qatar Airways flight QR934 manipud Doha.
Segun kenni OWWA Administrator Patricia Yvonne M. Gapuna, prioridad ti ahensia ti nasapa a panangsungbat kadagiti kasapulan dagiti OFW ken panangipaay iti nalawag nga impormasion kadagiti pamiliada nga agur-uray iti panagawidda.
Inton Martes, Oktubre 20, 65 pay nga OFW ti manamnama a sumangpet, a pakairamanan ti 50 a trabahador manipud Al Qassim ken 15 a babbai a mangay-aywan iti Kalinga House a naggapu idiay Dammam.
Agtultuloy ti koordinasion ti OWWA ken DMW, agraman ti Philippine Embassy ken ti Migrant Workers Office idiay Riyadh, tapno maurnos ti pannakagawid dagiti dadduma pay nga OFW nga agur-uray a makasubli iti pagilian.
