Natay iti maysa nga Overseas Filipino Worker (OFW) kalpasan ti napasamak nga intercepted drone attack iti oil field facility idiay Dammam, Saudi Arabia, kas kinumpirma ti Department of Migrant Workers (DMW) idi kalman, Huwebes, Oktubre 22.
Segun iti energy ministry ti Saudi Arabia, pinagsuwek ti air defense ti Saudi iti maysa a drone a naggandat a mang-puntirya iti maysa a pasilidad ti oil field idiay Saudi Aramco’s Shaybah, ngem nakatayan daytoy ti maysa nga overseas filipino worker kalpasan a natamaan ti debris manipud iti nasao a depensa.
Kabayatanna, agtultuloy a nakabantay ti Department of Migrant Workers kadagiti report a panagraut idiay Dammam, kadwa ti gobyerno ti Saudi ken dagiti otoridad tapno amwen iti dadduma pay nga apektado nga OFW iti insidente.
Inallokoy ni Secretary Hans Leo J. Cacdac dagiti Pilipino idiay Saudi Arabia, ken iti dadduma pay a paset ti Middle East, nga agtulnog kadagiti otoridad, agtalinaed nga alerto ken dumngeg kadagiti opisyal a direktiba manipud iti pagilian ken dadduma pay a host-country authorities.
Inabiswan metten ti ahensiya dagiti OFWs a liklikan dagiti lugar a mabalin a maapektaran iti panagraut, kas iti military installations ken oil facilities.
Pinalagipan na pay dagitoy a kitaen a naimbag iti flight schedules sakbay nga agbiyahe ken liklikan ti agala iti ladawan ken video kadagiti insidente nga adda pakainaiganna iti seguridad ti pagilian a Saudi.
